O bua feela ka kakaretso (dipolelo tse sa faneng ka dintlha). “Ba re…,” “Motho e mong le e mong o nahana…,” “Motho e mong le e mong wa tseba…” mme dipolelo tse tshwanang di sebediswa kgafetsa, haholo ha ho haswa ditaba tsa leshano. Mohlala, motho wa Botho ba ho Ikgesolla a ka jala leshano, jwalo ka “Ha ho motho ya ratang ho ya ntlong eo ya dijo; bohle ba e hloile.” Ha a botswa “Hore bohle ke mang?” o etsa e ka ke maikutlo a setjhaba sohle. Ka tlwaelo ho fumaneha hore ke motho a le mong feela ya buileng seo le hore motho eo a le mong ke Motho wa Botho ba ho Ikgesolla ka boyena.

Motho ya jwalo o sebetsana haholo le ditaba tse mpe, polelo e nyatsang kapa e lonya, ho qhelela thoko (ho etsa hore motho a shebahale a fosahetse kapa a sa tshwanelehe) le kgatello e akaretsang (diketso tse hatellang ba bang, tse etsang hore ba hlolehe, jj.).

Ha ho na ditaba tse monate kapa pabatso e fetiswang ke motho ya jwalo.

Motho wa Botho ba ho Ikgesolla o mpefatsa puisano ha a fetisa molaetsa kapa ditaba. Ditaba tse monate dia emiswa ebe ditaba tse mpe feela, tseo hangata di ekeditsweng, di a fetiswa.

Motho ya jwalo o iketsa eka o fetisa “ditaba tse mpe,” tseo ha e le hantle di qapilweng ke yena.

Motho wa Botho ba ho Ikgesolla o dula a kgetha sepheyo se fosahetseng (sesosa sa dintho) bakeng sa kgalefo ya hae.

Haeba lebidi la koloi ya hae le bataletse ka ho kganna hodima dipekere, o rohaka motho ya tsamayang le yena—mohlodi o fosahetseng wa bothata. Haeba seya-le-moya se haufi se llela hodimo haholo, o raha katse ya hae.

Haeba A ke sesosa se totobetseng, motho wa Botho ba ho Ikgesolla o beha B kapa C kapa D molato.

Motho wa Botho ba ho Ikgesolla ha a ka ke a qeta morero kapa ketso.

O pota-potwa ke merero e sa phethahalang le dintho tse qadilweng tse sa kang tsa phethwa.

Motho wa Botho ba ho Ikgesolla o tshehetsa feela dihlopha tse timetsang mme o hlasela sehlopha leha e le sefe se sebetsang ho haha le ho thusa batho.

Motho wa Botho ba ho Ikgesolla o na le mohopolo o mobe wa ho ba le thepa mme o nahana hore mohopolo wa hore mang kapa mang o na le seo e leng sa hae ke leshano le entsweng ho thetsa batho. Ho yena, ha ho na letho leo e leng thepa ya motho.